આયોજન વગરના જિંદગીના સૌથી લાંબા વિરામ પછી આજે વિધાનસભાના કાર્યાલયમાં હાજર રહીને ધીમે ધીમે કામકાજની શરુઆત કરવા જઇ રહ્યો છું ત્‍યારે સૌથી પહેલાં આભાર અને કૃતજ્ઞતાની લાગણી મારા એ હજારો સ્‍વજનો, મિત્રો, સમર્થકો, સંતો-મહંતો, ઓલિયા-ફકીર, પ્રિસ્‍ટ, મીડીયા અને સ્‍નેહીઓ પ્રત્‍યે પ્રદર્શિત કરું છું કે જેઓની શુભકામનાઓ, પ્રાર્થનાઓ, આશીર્વાદ, દુવાઓ અને ભલી લાગણી મને આવેલા હ્રદયરોગના હુમલા દરમ્‍યાન મારા સાથે રહેલ છે.

તા.ર૭.૬.ર૦૧૧ના સવારના સમયે મારા નિયમિત ક્રમ મુજબ પ્રાણાયામ અને યોગાસન પછી ટ્રેડમિલ પર ૧પ મિનિટ (બ્રિક્સ વોક) ઝડપથી ચાલવાની કસરત કરતો હતો ત્‍યારે છાતીમાં થોડો દુઃખાવો અનુભવ્‍યો. પરંતુ તેને નહીં ગણકારીને ૧પ મિનિટની કસરત પૂરી કરી. ત્‍યારબાદ છાતીમાં અસહ્ય દુઃખાવાએ એ વાતનો સંકેત આપી દીધો કે મને હાર્ટએટેક છે. સતત દુઃખાવો, ગુંગળામણ અને આંખ સામે આવતા અંધકારથી લાગતું હતું કે કદાચ જવાનો સમય આવી ગયો છે. મૃત્‍યુ સાથે મુલાકાતનો અનુભવ થતો હતો, પરંતુ મૃત્‍યુનો ડર મને ન હતો. સંધ્‍યાકાળે તો સહુનો સૂર્યાસ્‍ત થાય, પરંતુ મધ્‍યાહ્નને સૂર્યાસ્‍ત કદાચ મારા માટે સારો પણ હોઇ શકે, ખેર, સમયસર હોસ્પિ‍ટલ પહોંચી શક્યો અને ડોક્ટરશ્રીઓ મારફત મારી એન્જિયોગ્રાફી થઇ, પછી માલુમ પડયું કે હાર્ટને ૭૦ થી ૭પ ટકા લોહી પુરું પાડતી મુખ્‍ય આર્ટરી(એલએડી)ના મુખમાં જ ૧૦૦ ટકા બ્‍લોક છે. થોડીક ક્ષણોમાં એન્જિયોપ્‍લાસ્‍ટી થઇ અને મેડીકેટેડ સ્‍ટેન્‍ટ મૂકાઇ ગયું. !! વીડોમેકર !!ના નામથી ઓળખાતા આ પ્રકારના હાર્ટએટેકમાં ભાગ્‍યે જ દર્દી હોસ્પિટલ સુધી પહોંચી શકે છે. મારે કદાચ કાંઇક લેણું બાકી હશે માટે નવજીવન પ્રાપ્‍ત થયું છે.

ફેઇસબુક ઉપર કેટલાંક મિત્રોની કોમેન્‍ટ મને કેવા પ્રકારનો હાર્ટએટેક હતો તે જાણવાની ઉત્‍સુક્તા સાથે શુભેચ્‍છાઓની હતી. મારા ધ્‍યાને એક ગુજરાતી સાપ્‍તાહિકનો અંક હમણાં જ આવ્‍યો. જેમાં મને આવેલા હાર્ટએટેક જેવા હાર્ટએટેક અંગે એક પ્રકાશિત થયેલ લેખ તે આ સાથે સ્‍કેન કરીને મિત્રોની ઉત્‍સુક્તાનો પ્રત્‍યુતર મળે તે માટે મોકલું છું.